New Telugu News Channels coming up in January

తెలంగాణ ప్రాంతానికి పరిమితమై వాదాన్ని, నినాదాన్ని వినిపించడానికి మరో రెండు కొత్త చానళ్లు జనం ముందుకు రానున్నాయి. ఎంపీ వివేక్ టీం వి6 పేరుతో చానల్ తెస్తున్న విషయం అందరికీ తెలిసిందే.. అయితే ఈ చానల్లో ఇప్పటికే ట్రైనీ ఉద్యోగులను నియమించుకొని శిక్షణ ఇస్తున్నారని సమాచారం. సీనియర్లను తీసుకునే ముందు ఆచితూచి వ్యవహరిస్తున్నారని వినికిడి. జీతాల విషయంలో కూడా గతంలో కొన్ని చానళ్లలాగా బోల్తా పడకుండా.. కాస్తో కూస్తో ప్రతిభ ఉన్నవారికే పట్టం కట్టాలని యోచిస్తున్నట్టు ఆ చానల్‌తో సంబంధం ఉన్న నా సహచరుడు తెలిపాడు. అయితే అదే సాకుతో చానల్ ను ట్రైనీల చేతిలో పెట్టినా ఇబ్బందేనన్న విమర్శలు వినిపిస్తున్నాయి. ఏదేమైనా తెలంగాణ ప్రాంత జర్నలిస్టులకు మరిన్ని అవకాశాలు దొరికినట్టే.. ఇప్పటికే తెలంగాణ కళారూపాలను బుల్లితెరపై ఆవిష్కరించడంలో ముందున్న టీన్యూస్‌ని మరికొందరు అనుసరించబోయి బోల్త పడ్డారు. హెచ్ఎంటీవీ మాత్రం రసమయితో చేసే మార్మోగినపాట మాత్రం కాస్త సక్సెస్ అయిందనే చెప్పాలి. ఇక టీన్యూస్ లో ప్రేమ్‌రాజ్, జనార్దన్‌లు మొదలు పెట్టిన మాటా ముచ్చట నిరాటంకంగా కొనసాగుతోంది. ఇదో ట్రెండ్ సెట్టర్‌గా మారడం ఆ చానల్ సాధించిన విజయమే.. తరువాత మా టీవీని అనుసరించి పెట్టిన రేలారే ధూంధాం.. ఆరభశూరత్వంగా మారింది. టీవీ9 మాపల్లెపాట బొక్కాబోర్లా పడింది. గానపదమని,.. ఇంకా రకరకాలపేర్లతో పెట్టిన చానళ్లన్నీ ప్రొడక్షన్ క్వాలిటీ లేక, సరియైన ప్రొడ్యూసర్ లేక చతికిల పడ్డాయి. తాజాగా వి6 చానల్ కూడా ఇటువంటి కార్యక్రమం ఒకటి జజ్జనకరి జనారే.. పేరుతో రూపొందిస్తుందని అవిశ్వసనీయ సమాచారం. ఇక టిఎన్ఎన్ పేరుతో వచ్చే మరో తెలంగాణ నెట్‌వర్క్ చానల్.. రిక్రూట్ చేసుకుంటోంది. ఇందులో కళాకారులు, జర్నలిస్టు వృత్తిలో ఉన్నవారు ఇరువురూ పాలు పంచుకుంటున్నారు. అయితే ఈ చానల్ పై మీడియాలో భిన్న వాదనలు వినిపిస్తున్నా.. తెలంగాణ ప్రజల గొంతు వినిపించేందుకు మరోవేదకి దొరికినట్టయింది. కొత్తగా జర్నలిజంలోకి రావాలని ఉబలాట పడేవారికి ఇవి వేదికలుగా మారనున్నాయి. చానళ్లు ఎన్ని వచ్చినా 1వ తారీఖు వరకు జీతాలు చెల్లించేలా ఉంటే అదే పదివేలు..(స్టార్టింగ్ వేతనం ఐదువేలేలెండి)

ఇమేజ్ న్యూస్ ఛానెల్ వచ్చేస్తోంది...

ఇప్పటికే కెమెరా స్టాండ్లు పట్టే ప్రెస్ మీటింగ్ హాల్ వెతుక్కోడానికి ప్రెస్ మీట్ పెట్టేవాళ్లు ఇబ్బందులు పడుతున్నారు. ఎక్కడైనా ఏదైనా సంఘటన జరిగితే రిపోర్టర్లు కెమేరా మెన్స్, ప్రింట్ కెమెరా మెన్లు, ప్రింట్ జర్నలిస్టులతో కిటకిట లాడిపోతుంది. ఏదైనా ధర్నాజరిగినా.. మీటింగ్ జరిగినా.. జస్ట్ మీడియాకు ఇన్ఫర్మేషన్ ఇస్తే ఆ స్టాఫ్ తోనే సక్సెస్ అవుతుందనే సెటైర్లు కూడా ఈ మద్య పేలాయి. ఇప్పటికే ఉన్న న్యూస్ చాలదన్నట్టు... మరో మూడు చానళ్లు క్యూ కట్టిన విషయం తెలిసిందే.. వి6, టీఎన్‌ఎన్, తులసీ సీడ్స్ వారి చానల్ తో బాటు.. కొత్తగా ఇమేజ్ బ్రాడ్ కాస్టింగ్ రంగంలోకి దిగింది.. ఇప్పటికే ఆ సంస్థ జోరుగా రిక్రూట్‌చేసుకుంటోంది. ఇప్పటి వరకు వైద్యవ్యాపారంలో ఉన్న ఆ సంస్థ వార్తా వ్యాపారంలోకి దిగడంతో.. జర్నలిజాన్ని వృత్తిగా ఎంచుకునే వాళ్లకు.. ఇప్పటికే ఎంచుకొని రకరకాల అనుభవాలతో, అనుభూతులతో అవస్థలు పడే వాళ్లకు మరో మంచి అవకాశం వచ్చినట్టే. ఇమేజ్ బ్రాడ్ కాస్టింగ్ సంస్థ... అన్ని విభాగాల్లో రిక్రూట్ చేసుకుంటోంది.. ఆశావహులు అప్లై చేసుకోవచ్చు.....